Ciput Beureum - Pangalaman Para Mitra
Ciput Beureum - Lain ogè nu limpeuran, mun rèk barangbawa atawa nyiapkeun papakèan, pakèeun ayeuna atawa isukan. Ih sok aya wè nu tinggaleun jeung salah neundeun. Bibi kuring sok kitu tèh, meureun ti dituna mah tarapti, kaalaman ayeuna anyar kènèh. Pagawèan sapopoèna ngawarung bari gèntèl kèak ku anak. Angger indit ka pasarna sok mèmèh subuh, kawantu warungna kajojo da napuk-napuk waè nu balalanja tèh. Atuh solat subuh kaburu di imah. Kawas sasari hudang gesat-gesut dangdan, gap kana ciput maneuh sok dikaitkeun dina paku tungjangeun pangsarèanana, ambèh kari rap makè.
Kencling ka jalan megat angkot, leungeun katuhu mawa jingjingan jeung karung keur engkè wadah balanjaan, da ari balanja nu harampang kadaharan barudak, bari diladangan geus disiapkeun kantong palastik badag. Sanggeus mayar kari rigidig mawa. Lila ngajengjeng sisi jalan ngadagoan angkot can aya ngulampreng, lain waè bibi panumpang sèjènna sarua kesel, angkot can muntruk-muntruk. Aya kana limaanana cenah harita maregat angkot tèh, sajero narungguan nu lian ngan rut-rèt waè ka bibi.
Geus kitu silih pelong jeung nu sèjènna, nyèh sareuri ngan teu kebat da bari narungkup biwirna. Ari bibi mah cenah jongjon wè nangtung euweuh rèaksi naon-naon, salian tuhu megat angkot. Reug mobil eureun panumpang tingkalacat naraèk, supir rèt ka bibi biwirna ngarenyu, bari pokna.
“Cut, naèk!” Bari dèhèm ambèh teu tuluy seuri kawasna. Sajajalan supir biwirna ngan cu- cutan baè. Panumpang ger sareuri, ari bibi mah harè-harè wè nitènan catetan nu paresen poè ieu, bisi aya nu poho teu kacatetkeun. Angkot eureun muatkeun deui panumpang, gèk nu kakara naèk tèh gigireun bibi, gawèna ngan rut-rèt deui waè deuih, tuluy tungkul sungutna didèhèmkeun bangun teu hayang. Kitu jeung kitu wè cenah unggal aya nu unggah panumpang anyar tingrarèrèt, malah aya nu ngomong “tarik cang.”
Nepi ka pasar jrat-jrut tarurun, sanggeus anggang tina angkot mah, tingbarakatak aya ogè nu ngageubig-geubig baturna, teu eureun tingarakey. Supir sibuk mulutan ongkos, kitu deui bibi ngusiwel mikeun duit. Supir nyèrèngèh leungeun kèncana meungpeukkan sungut. Bibi labas ka jero pasar. Kawantu di pasar pagaliwota jeung jalma rèa, unggal nu pasarandog kitu wè ting arakey kawas aya nu lucu dina diri, cèk pikiran bibi. Rèngsè balanja gura-giru balik, nya kitu deui salila numpak angkot teu kacatur tingcikikik, nu tingkuciwes. Bibi, sadatangna ka imah henteu langsung ka cai wudu rèk solat subuh. Balanjaan gè ditinggalkeun ngabarak kènèh dina tèras. Banget ku panasaran gentak asup ka kamar, terus ngeunteung. Ana brèh dina sirah lain ciput nu dipakè, geuning cangcut beureum nu sarua pulasna. Bibi tibang kuram-kireun, bari ngagerendeng, kutan kieu ari nu limpeuran. dikaitkeun kana paku tèh salah nyokot, ciput pahili jeung cangcut.***
Ajat Sudrajat
Rancakendal – Rancaèkèk
Katerangan: Ieu seratan tèh parantos medal di Manglè nomer 2720. Kapilih janten PPM Pinilih Februari 2019. Hadiah PPM Pinilih disponsoran ku Dr. H. RM. Imam I Tunggara, Diréktur Yayasan Lembaga Pendidikan dan Pengetahuan Masyarakat Republik Indonésia (LPPM RI) Bandung.
